पश्चिम नवलपरासीमा प्रेम विवाहको विषयलाई लिएर झडप हुँदा २० जना घाइते भएका छन् ।
जिल्लाको पाल्हिनन्दन गाँउपालिका–३ बेलासपुरमा दुई समुदायबीच भएको झडपमा २० जना घाइते भएका हुन् ।
झडपका क्रममा स्थानीयले प्रहरीको गाडी जलाइदिएका छन् । प्रहरीको बा १ झ ७४४८ नम्बरको गाडी स्थानीयले बलेको टायर फालेर जलाइदिएका हुन् ।
दुई समुदायका युवा युवतीबीच प्रेम विवाह भएको र विवाद बढ्दै जाँदा झडपको अवस्था निम्तिएको प्रहरीको भनाइ छ ।
करिब चार महिना अगाडि फरक समुदायका युवा युवतीबीच विवाह भएपछि विवाद भइरहेको गाउँमा गाडीले मान्छे हानेको विषयलाई लिएर विवाद उग्र बनेको थियो ।
नवलपरासी पश्चिमका निमित्त प्रमुख जिल्ला अधिकारी भविश्वर घिमिरेका अनुसार ५ जना स्थानीय, १२ जना जनपथ प्रहरी र ४ जना सशस्त्र प्रहरी घाइते भएका छन् ।
गाडीले ब्याक गरेर मान्छे हानेको विषयबाट सुरु भएको विवादबाट केटा र केटी पक्षबीच झडप भएको उनले बताए ।
विवाद हुँदा नजिकै रहेको पुरानो टायरको ग्यारेजमा आगजनी गरिएको र ग्यारेज नजिकैको घरमा रहेको मान्छे बचाउन गएको प्रहरीको गाडीमा बलेको टायर फालेर आगजनी गरिएको प्रजिअ घिमिरेले बताए ।
घटनाबारे सुक्ष्म रूपमा अनुसन्धान सुरू गरिएको प्रहरीले जनाएको छ ।
