नेपाली विद्यार्थीहरूलाई दुर्व्यवहार गरेको आरोपमा पक्राउ परेका भारतको ओडिसा राज्यस्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयका कर्मचारीहरू पाँच जना धरौटीमा छुटेका छन् ।
केआईआईटी युनिभर्सिटीका तीन जना निर्देशक र दुई सुरक्षा गार्डलाई त्यहाँको एक अदालतले २० हजार रुपैयाँ धरौटीमा छाड्न आदेश दिएको हो । रिहा हुनेमा कलेजको मानव स्रोत विभागका कार्यकारी निर्देशक शिवानन्द मिश्र, प्रशासनका निर्देशक प्रतापकुमार चम्पाठी, होस्टलका निर्देशक सुधिरकुमार राठ, सुरक्षा गार्ड रमाकान्त नायक र जोगिन्द्र बेहेरा छन् ।
केआईआईटीमा बी–टेक तेस्रो वर्षमा अध्ययनरत बुटवलकी प्रकृति लम्साल आइतबार मृत अवस्थामा भेटिएकी थिइन् । उनी कलेजको होस्टेलमा मृत भेटिएकी हुन् । घटनापछि आक्रोशित नेपाली विद्यार्थीहरूले विरोधका लागि सडकमा उत्रिएका थिए । उनीहरूले विश्वविद्यालय अगाडि प्रदर्शन गर्दै लम्सालका लागि न्यायको माग गरेका थिए । तर, ती विद्यार्थीहरूमाथि कलेज प्रशासनले दमन गर्दै कलेजबाट निकालेको थियो । त्यसपछि विश्वविद्यालयका कर्मचारीहरू समातिएका थिए ।
