काठमाडौं, २०८१ फागुन ३ – हजारौं वर्षदेखि आस्थाको केन्द्र मानिँदै आएको मुक्कुम्लुङमा सरकारले निजी व्यापारीहरूलाई केवलकार निर्माणको अनुमति दिएको विरोधमा स्वदेशी अधिकारवादी तथा आस्थावान समुदाय सशक्त आन्दोलनमा उत्रिएका छन्।
मुक्कुम्लुङमा भइरहेको धार्मिक तथा सांस्कृतिक अतिक्रमण स्वदेशी लिम्बु (याक्थुङ) समुदायको आत्मनिर्णय र स्वशासनमाथि गम्भीर हमला भएको आन्दोलनरत समूहको आरोप छ। नेपाल सरकारले ILO 169 तथा UNDRIP मा हस्ताक्षर गरिसकेको अवस्थामा स्वदेशी जनताको पूर्वजानकारीसहितको सहमति नलिई परियोजना अघि बढाइनु औपनिवेशिक विस्तारवादको प्रमाण भएको उनीहरूको भनाइ छ।
यसैक्रममा, राष्ट्रिय मुक्ति पार्टी नेपालका नेतृत्वहरू फागुन ८ गते “मुक्कुम्लुङ बचाउँ पदयात्रा” मा सहभागी हुन यात्रारत रहनेछन्। योङ इन्डिजिनिष्ट लिग (Young Indigenist League) समेत संघर्षमा ऐक्यबद्धता जनाउँदै स्वदेशी अधिकार सुरक्षाका लागि अग्रसर रहने घोषणा गरेको छ।
आन्दोलनकारीहरूले व्यापारीहरूले सरकारी सुरक्षादस्ता दुरुपयोग गर्दै स्वदेशी अधिकारवादीहरूमाथि आक्रमण गर्न खोजेको भन्दै आपत्ति जनाएका छन्। यदि सुरक्षाकर्मी तथा भाडाका समूह प्रयोग गरेर स्वदेशी जनतालाई उनीहरूको भूमि, भूक्षेत्र तथा स्रोतहरूबाट विस्थापित गर्ने प्रयास गरिएमा, सशक्त प्रतिकार गर्ने चेतावनी दिइएको छ।
योङ इन्डिजिनिष्ट लिगका अनुसार, “यदि नेपाली सुरक्षाकर्मीहरू उपनिवेशवाद जोगाउन मात्र प्रयोग गरिन्छन् भने, हामी हाम्रो जनताको सुरक्षा आफैँ गर्न सक्षम छौँ। यस्तो जबर्जस्ती कार्यका कारण उत्पन्न हुने जुनसुकै परिणामको सम्पूर्ण जिम्मेवारी सरकार आफैँले लिनुपर्नेछ।”
स्वदेशी अधिकार संरक्षणका लागि विभिन्न राजनीतिक दल, सांस्कृतिक तथा धार्मिक समुदायहरूले ऐक्यबद्धता जनाउँदै आएको छन्। मुक्कुम्लुङ बचाउन संघर्षरत आस्थावान समुदायले यो अभियानलाई जीवन-मरणको सवालको रूपमा लिएको छ।
