बलात्कार मुद्दामा अदालतबाट दोषी ठहर भएर १४ वर्ष सजाय तोकिएका एक फरार अभियुक्त पक्राउ परेका छन् ।
पक्राउ पर्नेमा लहान नगरपालिका–२४ का ४५ वर्षीय भोगिन्द पासवान रहेका छन् । सिरहा प्रहरीका प्रवक्ता डीएसपी विरेन्द्रकुमार पासवानका अनुसार, फरार रहेका उनलाई आइतबार दिउँसो ३ बजे इलाका प्रहरी कार्यालय लहानको टोलीले पक्राउ गरेको हो।
सोमबार सिरहा जिल्ला अदालतमा पेश गरिएका अभियुक्त पासवानलाई अदालतको आदेशअनुसार कैद भुक्तानका लागि सिरहा कारागार पठाइएको डीएसपी पासवानले जानकारी दिए ।
उच्च अदालत जनकपुर, राजविराज इजलासले ९ फागुन २०८० मा उनलाई १४ वर्ष कैद तथा २५ हजार रुपैयाँ जरिवानाको सजाय सुनाएको थियो।
